Zindagi ko samjhiye kuch aise- My first poem

Zindagi ko samjhiye kuch aise:
baagh mein phool jaise,
un phoolon mein kaatein jaise.

Zindagi ko samjhiye kuch aise:
aasmaan mein ghire kaale megh jaise,
megha ke saath aaye indrdhanush jaise.

Zindagi ko samjhiye kuch aise:
tez hawa ka jhoka jaise,
udaan bharta us jhoke pe koi panchi jaise.

Zindagi ko samjhiye kuch aise:
koyal ki meethi kook jaise
aur sher ki dhaad jaise.

Zindagi ko samjhiye kuch aise:
raat ka sannata jaise,
raat ke baad aayi subah ki khilti dhoop jaise.

Zindagi ko samjhiye kuch aise:
shishu ki kilkaari jaise,
maa-baap ki tapasya jaise.

Zindagi ko samjhiye kuch aise:
gulshan mein khilte gulab jaise
ya keechal mein khilte kamal jaise.

Zindagi ko samjhiye kuch aise:
madhushala mein pyaas jaise,
jaam peeke befikri jaise.

Zindagi ko samjhiye kuch aise:
thirakti hui nritanga jaise,
aur kabhi thame hue uske toote ghungroo jaise

Zindagi ko samjhiye kuch aise:
bheed mein ghusne ki ghabrahat jaise,
usi bheed se bedaag nikalne ka sakoon jaise.

Zindagi ko samjhiye kuch aise:
pyaar ki umang jaise,
ya kisi apne ko bhoolane ka dard jaise.

Zindagi ko samjhiye kuch aise:
gyani ke antim wachan jaise,
ya seekhna pehla sabak jaise.

Zindagi ko samjhiye kuch aise:
kal kal behte paani mein doobna jaise,
doobte ko mile tinke ke sahare jaise.

Zindagi ko samjhiye kuch aise:
cheeti ka deewar se girna jaise,
himmat na harte hue deewar pe uska phir chadna jaise.

Romantic shayari

Aksar khayalo mein unse baatein karte hai
ye khwaab haqeeqat ban jaaye, dua karte hai
kaisa aalam hoga jab wo honge sach mein rubaroo
kaise sambhalenge wo ye toofan
ye sochke hum haste hain..

dil hai, to aarzoo hai tumhari
aankhein hai dekhne ke liye surat tumhari
tez dhadkan hai, wo bhi hai den tumhari
shayri hai, to tareef ke liye tumhari
aur kaise kahoon,
ban jao na hamari

Teri aankhon mein wo jadoo hai,
ki dil kheecha chala jaata hai
mat chala ye jadoo mujhpe
ki na chahate hue bhi tujhse pyar hua jaata hai

aapne labho se kuch kaha nahi
fir bhi hamne sab sun liya
ye kamal hai aapki aankhon ka
jinhone hame apna kayal bana liya

Kyon har jagah tumko dhoonti hain hamari nighaien, samajh nahin aata hai
kyon tumhara khayal hamein har pal satata hai, samajh nahin aatan hai
kyon tumhe apne aasuon mein bhigone ko ji chahta hai, samajh nahin aata hai
Kya ye hi pyar to nahin, jisko hamein samjhana nahin aata hai

chand se door chandni nahi,
gulab se door khushboo nahi,
tujh se door mai nahi
aur hamse door mohabbat nahi

Mera dil kyon hai ab tak mere paas,
nahi mila wo banda khaas,
aur kahan dhundu tujhe sanam,
kya tujhe nahi mujhse milne ki pyaas.

Har surat mein dhundu surat teri,
har khawab mein dhundu chavi teri,
har charche mein dhundu baat teri,
ab jaante hai sab deewangi meri,
dhunte hai mujh mein shaksiyat teri.

khaali baithe bhi waqt guzar jaata hai,
sab kamaal hai tera;
tanha akele bhi mann lag jaata hai,
sab kamaal hai tera;
har jagah saath mehsoos hota hai,
sab kamaal hai tera;
bin dekhe bhi pyaar hota hai,
sab kamaal hai tera;

Sad Shayari

Mujhe uski aadat ho chali hai,
sochti hoon ye aadat kaise jaayegi
mushkil hoga usse bhool paana,
is koshish mein shayad naukri chali jaayegi

hai gum bichadne ka ki din kam hai
aei bhagwan dikhana na aise din dubara
ki mujh mein ab himmat kam hai

yaad hai wo pehli mulaqat
yaad hai wo pehli late-night call
yaad hai wo pehli baar 'tum' se 'tu' tak aana
yaad hai wo pehli meethi takraar
yaad hai wo pehli kashmakash
yaad hai wo pehla jaam saath
yaad hai wo pehla izahar
yaad hai wo toofan
yaad hai wo pehli berukhi
aaj jab kuch nahi hai bacha is rishte mein
yaad hai mujhe ab bhi wo jazbaat

Coding ki jagah shayari ho rahi hai,
bhagwan se maut ki guzarish ho rahi hai,
ab to tum aa jao ki marne se pehle,
tumhe dekhne ki chah ho rahi hai

toot ke bikhar sakti hoon mai
unko dil se nikalna jo mushkil hai
kya koi mere dil mein itna utar payega ab
is dil mein jagah pana jo mushkil hai

main teri na ho saki,
tere rang mein rang na saki,
tujhe waqt rehte rok na saki,
kya bataun dost,
majbooriyan aisi thi ki teri khushi k liye kurbaan na ho saki

wo hamare kaabil na ban sake
unhe humse ulfat jo kam thi
hum bhi unhe rok na sake
hum mein ego jo itni thi

hum khush hai ye jaan ke ki unhe hamari zaroorat nahi
saare jattan hue kamyab unse door rehne ke
itna aasan hoga ye kaam
hame tha maloom nahi

aaj fir aap yaad aa gaye
aaj fir aankh mein aansoon aa gaye
bhar lijiye mujhe apni bahon mein aaj
aap se door jaane ke din kareeb aa gaye

Unke pehlun mein rone ko hum taiyar hai,
Apna sab kuch unhe soupne ko taiyar hai,
Bas ab wo der na kare,
ke unhe ek baar dekhkar,
Hum marne ko bhi taiyar hai

Dil mein hai ek toofan, vo jaane kyon nahin thamta
Jisse zikr karein aapka, wo insaan nahin milta
Samajh nahin aata, kami hai zaada kiski,
aapki ya uss ek dost ki jisse chupane pe bhi dil ka koi raaz nahi chupta

Kabhi to kahiye aap hame bhool nahi paayenge,
dosto se bhari mehfil mein hamari kami paayenge
aap chahe na chahe
apni kuch yaado mein hamein zaroor paayenge